WANANCHI WAOMBA USHIRIKIANO KWA JESHI LA POLISI

 

Na, Sada Salum

Wananchi wa Kata ya Nyasubi katika Manispaa ya Kahama mkoani Shinyanga wamelitaka jeshi la polisi kuonesha ushirikiano kwa wananchi pindi matukio ya kihalifu yanapojitokeza.

Wamesema hayo April 29, 2022 wakati wa mkutano wa hadhara uliowahusisha wananchi wa Kata hiyo, viongozi wa Kata pamoja na jeshi la polisi Wilaya ya Kahama ambapo wamedai kuwa jeshi la polisi limekuwa likichelewa kufika eneo la tukio na kupelekea wahalifu kutokukamatwa.

Hamad Mnubwa mkazi wa Mtaa wa Nyakato, amesema polisi hawana ushirikiano na raia pindi inapotokea taarifa za uhalifu hivyo wanaliomba jeshi hilo kuwa na ushirikiano na wananchi.

Nae Juma Ngoma mkazi wa Mtaa wa Nyakato mwisho amesema baadhi ya maafisa polisi wamekuwa hawana majibu mazuri kwa wananchi ambao wanatoa taarifa za uhalifu.

Kwa upande wake mwakilishi wa Jeshi la Polisi Kahama ambaye ni mkuu wa Upelelezi Manispaa ya Kahama ASP Maro amesema wananchi wanapaswa kuwa na ulinzi shiriki wakati huu ambao kituo cha polisi kikiwa hatua ya ukamilishaji kwenye Kata hiyo.

Hata hivyo Afisa polisi jamii Mkaguzi amewataka vijana kujitokeza katika kufaya ulinzi shirikishi huku akiwataka wananchi kutii sheria kwa kutojichukulia sheria mkononi pindi wanapowakamata wezi au wahalifu.

MWISHO