BIBI WA MIAKA 90 AUAWA KWA KUCHOMWA NA KITU CHENYE NCHA KALI KICHWANI.

Matukio ya kikatili bado yanaendelea kuikumba Manispaa ya Mpanda mkoani Katavi baada ya kutokea mauaji ya bibi kikongwe Marieta Thomas mwenye umri wa miaka 90 mkazi wa mtaa wa Mpanda hotel.

Bibi huyo ameuawa kwa kuchomwa na kitu chenye ncha kali kichwani na watu wasiofahamika.

Tukio hilo linadaiwa kutokea usiku wa kuamkia leo Jumatatu ya Pasaka baada ya majirani wa marehemu kugundua kuwa bibi kikongwe huyo ameuawa.

Akizungumza kwa simu na mtandao huu kamanda wa jeshi la polisi mkoani Katavi ACP Ally Makame amethibitisha kutokea kwa tukio hilo akisema kuwa chanzo cha mauaji hayo ni imani za kishirikina.

Aidha kamanda Makame amesema licha ya kutokukamatwa kwa watu waliotekeleza mauaji hayo lakini wanaodhaniwa ni wajukuu wa bibi huyo kutokana na kutokufika katika msiba huo.